ຮຽນ : ທ່ານ ສະໝານ ວິຍະເກດ ກຳມະການກົມການເມືອງສູນກາງພັກ, ຜູ້ຊີ້ນຳວຽກງານແນວຄິດ, ທິດສະດີ ແລະ ວັດທະນາທຳສູນກາງ, ປະທານກິດຕິມະສັກ ອົງການກາແດງລາວ ທີ່ນັບຖື.
- ທ່ານແຂກທີ່ມີກຽດ ພາຍໃນ ແລະ ຕ່າງປະເທດ ທີ່ຮັກແພງທັງຫລາຍ.
- ທ່ານຍິງ ແລະ ທ່ານຊາຍ.
- ບັນດາສະມາຊິກອາສາສະໝັກກາແດງ.
ມື້ນີ້,ໃນທ່າມກາງບັນຍາກາດທີ່ທົ່ວພັກ ທົ່ວກອງທັບ ແລະ ທົ່ວປວງຊົນລາວບັນດາເຜົ່າ ໄດ້ພ້ອມກັນຈັດຕັ້ງປະຕິບັດ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ຂອງພັກ ເປັນຕົ້ນແມ່ນການແກ້ໄຂຄວາມທຸກຍາກຂອງປະຊາຊົນເຮັດໃຫ້ປະເທດຊາດຫຼຸດພົ້ນອອກຈາກຄວາມດອ້ຍພັດທະນາ ພ້ອມນີ້ກໍເປັນການສ້າງຂະບວນການກຽມໃສ່ກອງປະຊຸມໃຫຍ່ຄັ້ງທີ IX ຂອງພັກທີ່ຈະມາເຖີງໃນຊຸມປີໜ້ານີ້.
- ທ່ານ ແຂກທີ່ມີກຽດ.
- ທ່ານ ຍິງ ແລະ ທ່ານຊາຍ ທີ່ຮັກແພງ.
ຄຳຂວັນຂອງວັນທີ 8 ພຶດສະພາ, ວັນກາແດງແລະຊີກວົງເດືອນແດງສາກົນ ປີ 2010 ຄື : ** ການຂະຫຍາຍຕົວຢ່າງວອງໄວຂອງຕົວເມືອງ ເປັນກຸນແຈ ແລະ ຮູບແບບຕົວຈິງ - ໂລກຂອງພວກເຮົາຂຶ້ນກັບການກະທຳຂອງທ່ານ ** ກໍາລັງເກີດຂຶ້ນໃນອານາຄົດ...
ກ: ທີ່ພັກອາໃສຢູ່ໃນຕົວເມືອງໃຫຍ່ ຫຼື ມະຫານະຄອນເຮັດໃຫ້ມີຜູ້ຄົນກວ່າເຄີ່ງໜຶ່ງຂອງພົນລະເມືອງລວມຂອງໂລກປະຈຸບັນ.
ðສູນກາງໃນຕົວເມືອງໃຫຍ່ ຫຼື ມະຫານະຄອນ ເປັນທີ່ພັກອາໃສຂອງພົນລະເມືອງໂລກເຄິ່ງໜື່ງ(ປະມານ 3 ຕື້ຄົນ),ບັນດາສູນກາງຂອງຕົວເມືອງໃຫຍ່ດັ່ງກ່າວເປັນເຄື່ອງຂັບເຂື່ອນຂອງສັງຄົມມັ້ງຄັ້ງ,ສະແດງອອກທາງວັດທະນາທຳ,ຄວາມຫຼາກຫຼາຍແລະເສດຖະກິດຂະຫຍາຍຕົວແຮງ ແຕ່ມັນກໍມີດ້ານລົບຊຶ່ງພວກເຮົາຮູ້ກັນດີຄື:
- ມົນລະພິດທາງອາກາດ, ຄວາມຮຸ່ນແຮງ, ອາດຊະຍາກຳທຸກປະເພດ, ຢາເສບຕິດ, ຂາດອະນາໄມ, ແລະ ການເຊື່ອມໂຊມດ້ານສິ່ງແວດລອ້ມ, ຄວາມທຸກຍາກຂາດເຂີນ ແລະ ຖືກປັດໄຈອື່ນຈາກສັງຄົມ ພ້ອມທັງເພີ້ມຄວາມສ່ຽງຂອງມະນຸດ.
- ຮອດປີ 2030 ເພີ່ນໄດ້ຄິດການປະມານໄວ້ວ່າ : ຈະມີພົນລະເມືອງ 4 ຕື້ 900 ລ້ານຄົນ ດຳລົງຊີວິດຢູ່ໃນສະພາບແວດລອ້ມຂອງຕົວເມືອງດັ່ງກ່າວ( ຫລາຍກວ່າ 60 ສວ່ນຮ້ອຍຂອງພົນລະເມືອງໂລກ) ( UN-HABITAT ).
- ໃນໂລກປະຈຸບັນນີ້, ຕົວເມືອງໃຫຍ່ ຫລື ມະຫານະຄອນຕ່າງໆ ແມ່ນເກີດຂື້ນຢູ່ໃນບັນດາປະເທດທີ່ມີລາຍຮັບຕໍ່າ ຫລື ລາຍຮັບປານກາງ.
- ບັນດາຕົວເມືອງໃຫຍ່ຂອງໂລກທີ່ກຳລັງພັດທະນາ, ອາດມີເຖີງ 95 ສວ່ນຮອ້ຍຂອງການຄິດປະເມີນລວມໄວ້ທີ່ຈະຂະຫຍາຍຕົວໃນ 2 ທົດສະຕະຫວັດໜ້າ ( UNFPA ).
- ອາຟຣິກກາອາດສາມາດສູງເຖີງ 15 ສວ່ນຮອ້ຍ ຕໍ່ການຂະຫຍາຍຕົວຂອງພົນລະເມືອງໂລກ, ຢູ່ໃນຕົວເມືອງໃຫຍ່ເມື່ອຮອດປີ 2030 ( ສຳລັບ ອາຊີ : ມີປະມານ 55 ສວ່ນຮ້ອຍ ).
ð ສອງສວ່ນສາມຂອງພົນລະເມືອງໂລກທີ່ດຳລົງຊີວິດຢູ່ໃນຕົວເມືອງໃຫຍ່ ຫລື ມະຫານະຄອນຕ່າງໆ 10,5 ລ້ານຄົນ ເປັນຄົນອົບພະຍົກ ( UNHCR ).
ຂ: ຄວາມສ່ຽງຂອງພົນລະເມືອງຢູ່ໃນຕົວເມືອງໃຫຍ່ມີຄື :
- ປະມານ 1 ຕື້ຄົນ, ດໍາລົງຊີວິດຢູ່ໃນຄວາມທຸກຍາກຂາດເຂີນ, ຄຸນນະພາບຕໍ່າ, ເຮືອນຊານໜາແໜ້ນ, ແອອັດຢູ່ອ້ອມຮອບຂອງຕົວເມືອງໃຫຍ່ ກາຍເກີດເປັນ ** ສະລຳ ** ຫລືພົນລະເມືອງມາຕັ້ງຖິ່ນຖານທີ່ບໍ່ຖືກຕ້ອງຕາມລະບຽບການ, ບັນດາພົນລະເມືອງດັ່ງກ່າວມີຄວາມສ່ຽງສູງຕໍ່ການເປັນພະຍາດຕ່າງໆ ຄື : ພະຍາດໂລກເອດ, ວັນນະໂລກ ແລະ ອື່ນໆ, ພົນລະເມືອງໂລກໃນ ** ສະລໍາ ** ດັ່ງກ່າວອາດຂະຫຍາຍຕົວສູງ ເຖີງ 1,5 ຕື້ ຄົນ, ພາຍໃນ ປີ 2020 ( UN-Habitat ).
- 680.000.000 ຄົນ ທີ່ພັກອາໃສຢູ່ໃນຕົວເມືອງໃຫຍ່, ຂາດເຂີນນ້ຳສະອາດໃຊ້ປະຈຳວັນ( UN-Habitat ).
- 1 ສວ່ນຮອ້ຍຂອງຄົວເຮືອນຢູ່ໃນບັນດາປະເທດທີ່ມີລາຍຮັບຕໍ່າ ຊຶ່ງມີຄວາມຫລົ້ມເຫລວທາງດ້ານການປະກັນໄພ, ເມືອ່ສົມທຽບກັບບັນດາປະເທດທີ່ມີລາຍຮັບສູງເຖີງ 30 ສວ່ນຮອ້ຍ.
- ທະວີບອາຊີມີຄວາມເປັນໄປໄດ້ສູງຕໍ່ການເກີດລົມພະຍຸຝົນຂຶ້ນ ເຮັດໃຫ້ເກີດນ້ຳຖວ້ມໃນປະຈຸບັນ ແລະ ໃນອານາຄົດ, ໃນ 20 ຕົວເມືອງໃຫຍ່ທີ່ມີພົນລະເມືອງອາໃສຢູ່ຢ່າງໜາແໜ້ນນັ້ນແມ່ນມີຄວາມເປັນໄປໄດ້ສູງຕໍ່ການປະເຊີນໜ້າກັບນ້ຳທະເລສູງຂື້ນ ແລະ ລົມພະຍຸຝົນທະລົມ, ຢູ່ໃນປີ 2005 ນັ້ນ ເຄິ່ງໜື່ງຂອງບັນດາຕົວເມືອງດັ່ງກ່າວ ແມ່ນເປັນປະເທດທີ່ມີລາຍຮັບຕໍ່າ ແລະ ລາຍຮັບປານກາງຂອງບັນດາປະເທດໃນທະວີບອາຊີ ( OECD ).
- ບັນດາຊຸມຊົນໃນສະລຳ ເປັນເຂດທີ່ຢູ່ອາໃສ ທີ່ມີຄວາມສ່ຽງໄພເລື້ອຍໆ ເຊັ່ນຕົວຢ່າງ: ເກີດໄພທຳມະຊາດນ້ຳຖວ້ມ, ອັກຄີໄພ, ລົມພະຍຸພັດຜ່ານ ດັ່ງນີ້ເປັນຕົ້ນ. ແລະ ກໍເປັນຊຸມຊົນທີ່ບໍ່ມີສິດທິເປັນເຈົ້າຂອງທີ່ດິນທີ່ຕົນເອງອາໃສຢູ່.
- ຄວາມຮູ່ນແຮງ - ການຈັດຕັ້ງກໍ່ອາດສະຍາກຳ ແມ່ນໜຶ່ງໃນການທ້າທາຍອັນຍິ່ງໃຫຍ່ຢູ່ໃນຕົວເມືອງໃຫຍ່ ຫລື ມະຫານະຄອນ.
- ການເກີດຄວາມຮຸ່ນແຮງຂຶ້ນຢູ່ໃນຕົວເມືອງໃຫຍ່, ສວ່ນຫລາຍແມ່ນມາຈາກຊາວໜຸ່ມທີ່ມີອາຍຸກະສຽນລະຫວ່າງ 15 ຫາ 25 ປີ ( UN-Habitat / WHO ).
ຍ້ອນມວນມະນຸດເຮົາດຳລົງຊີວິດແບບບໍ່ມີການຄຳນຶງເຖີງສິ່ງແວດລ້ອມ ບໍ່ມີແຜນການປ້ອງກັນ ແລະ ຮັບມືກັບທຳມະຊາດ ເຊັ່ນ: ດິນຟ້າອາກາດມີການປ່ຽນແປງພາໃຫ້ເກີດພາວະໂລກຮ້ອນ, ການຈູດໄມ້ທຳລາຍປ່າ, ເກີດສະພາວະແລ້ງແຫ້ງ ສິ່ງແວດລ້ອມເຊື່ອມໂຊມ … ເຮັດໃຫ້ ຄາບອນໄດອອກຊາຍ (CO2) ໄປທຳລາຍ ຊັ້ນບັນຍາກາດ ໂອໂຊນ ( O2) ເຮັດໃຫ້ເກີດປະກົດການ ເຮືອນແກ້ວ, ໂລກຮ້ອນຂຶ້ນ, ພູມອາກາດມີການປ່ຽນແປງ, ພາໃຫ້ເກີດມີພະຍຸໄຕ້ຝຸ່ນ, ເກີດມີນ້ຳຖວ້ມຮ້າຍແຮງ, ເກີດມີແຜ່ນດິນໄຫວຮຸ່ນແຮງ ແລະ ຖີ່ຂຶ້ນ, ພູໄຟລະເບີດ, ຄື້ນຍັກຊຸນາມີ ແລະ ອື່ນໆ ກໍ່ໃຫ້ເກີດມີໄພພິບັດອັນໃຫຍ່ຫລວງທີ່ກະທົບໂດຍກົງຕໍ່ຊີວິດແລະຊັບສິນຂອງມວນມະນຸດໃນໂລກນີ້. ອີກຢ່າງໜຶ່ງ ຊາວໂລກກຳລັງປະເຊີນໜ້າກັບມະຫັນຕະໄພຈາກຜູ້ກໍ່ການຮ້າຍ ຫລື ຂໍ້ຂັດແຍ້ງລະຫວ່າງມະນຸດດວ້ຍກັນ ອັນນຳໄປສູ່ສົງຄາມລະ ຫວ່າງປະເທດ ພາໃຫ້ເກີດມີການສູນເສຍຢ່າງໃຫຍ່ຫລວງ, ທຸກຢ່າງທີ່ກ່າວມານັ້ນລວ້ນແຕ່ເກີດຈາກນ້ຳມືຂອງມະນຸດ. ສະນັ້ນ ຄະນະກຳມະການກາແດງສາກົນ (ICRC) ຮວ່ມກັບສະຫະພັນກາແດງ ແລະ ຊີກວົງເດືອນແດງສາກົນ (IFRC) ຈຶ່ງຮັບພາລະໜ້າທີ່ອັນໜັກໜວ່ງນີ້ ແລະ ພວມປະເຊີນໜ້າກັບສິ່ງທ້າທາຍຢູ່ໃນປະຈຸບັນ.
ມື້ນີ້ ກໍນັບວ່າເປັນອີກວັນໜື່ງຊຶ່ງຂະບວນການກາແດງແຫ່ງໂລກ ຫຼື ເວົ້າຢ່າງໜຶ່ງກໍແມ່ນແຕ່ລະປະເທດ ທີ່ ເປັນສະມາຊິກຂອງຄະນະກຳມະການກາແດງສາກົນ ແລະ ສະມາຊິກຂອງສະຫະພັນກາແດງ ແລະ ຊີກ ວົງເດືອນແດງສາກົນ ໄດ້ພ້ອມພຽງຮຽງໜ້າກັນ ຈັດການສະເຫຼີມສະຫຼອງ ວັນທີ 8 ພຶດສະພາ ຊຶ່ງຖືກັນວ່າ ເປັນວັນກໍ່ຕັ້ງອົງການກາແດງສາກົນ ແລະ ກໍເປັນອົງການມະນຸດສະທຳທີ່ໃຫຍ່ທີ່ສຸດຂອງໂລກຂຶ້ນນະທີ່ນີ້.
ພາຍໃຕ້ຄຳຂວັນທີ່ວ່າ “ ການຂະຫຍາຍຕົວຢ່າງວອງໄວຂອງຕົວເມືອງ ເປັນກຸນແຈ ແລະ ຮູບແບບຕົວຈິງ - ໂລກຂອງພວກເຮົາຂຶ້ນກັບການກະທໍາຂອງທ່ານ” ຂະບວນການກາແດງມີການເຄື່ອນໄຫວ ທີ່ເປັນຕົນ ເອງແບບ ເອກະລາດແລະເປັນກາງ ໂດຍໄດ້ມີເຄື່ອງ ໝາຍສະເພາະເປັນຮູບກາກະບາດສີແດງບົນ ພື້ນສີຂາວ ແລະ ໄດ້ຖືກຈັດໃຫ້ມີຂຶ້ນຕາມສົນທິສັນຍາເຊີແນວ ເມື່ອປີ 1864 (ເປັນສະບັບທຳ ອິດ), ກາກະບາດດັ່ງກ່າວນີ້ບໍ່ແມ່ນເຄື່ອງ ໝາຍທາງສາສະໜາໃດໆທັງສິ້ນ ແຕ່ຊີ້ບອກເຖີງການສະແດງ ຄວາມເຄົາລົບ ນັບຖືຕໍ່ປະເທດ ສະວິດເຊີແລນ ຊຶ່ງທຸງຊາດ ຂອງປະເທດນີ້ ແມ່ນມີກາກະບາດສີຂາວ ບົນພື້ນທຸງສີແດງ ຍ້ອນເຫດວ່າ ທ່ານ ຮັງຣີ ດຸຍນັງ ( Henry Dunant ) ເປັນຊາວສະວິດເຊີແລນ, ເພື່ອຈາລຶກເຖີງຄຸນງາມຄວາມດີ ຂອງ ທ່ານ ຮັງຣີ ດຸຍນັງ ( Henry Dunant ) ຊຶ່ງເປັນຜູ້ກໍ່ຕັ້ງກາແດງ ບິດາຂອງຜູ້ມີນ້ຳໄຈມະນຸດສະທຳ ຜູ້ທຳອິດຂອງໂລກ, ເພິ່ນຈຶ່ງໄດ້ກຳນົດເອົາວັນເກີດຂອງທ່ານ ວັນທີ 8 ເດືອນພຶດສະພາ ເປັນວັນສ້າງຕັ້ງກາແດງ ແລະ ຊີກວົງເດືອນແດງສາກົນ, ກອງປະຊຸມກາແດງສາກົນຄັ້ງທີ 1 ປີ 1867 ໄດ້ຈັດຂຶ້ນຢູ່ ປາຣີ ປະເທດຝຣັ່ງເສດ ແລະ ສີ່ປີຕໍ່ມາພາຍຫຼັງໄດ້ກໍ່ຕັ້ງຄະນະກຳມະການກາ ແດງສາກົນຂື້ນ ຫຼື (ICRC) ແລະ ສະພາກາແດງແຫ່ງຊາດ ຕ່າງໆ ໃນກອງປະຊຸມດັ່ງກ່າວໄດ້ເຕົ້າໂຮມເອົາ ຄະນະ ກຳມະການກາແດງສາກົນ ແລະ ສະພາກາແດງແຫ່ງ ຊາດຕ່າງໆ 16 ປະເທດ ແລະ ມີຜູ້ຕາງໜ້າລັດຖະບານ 9 ປະເທດຂອງເອີຣົບເຂົ້າຮ່ວມ, ໃນປີ1876 ຫລາຍປະເທດ ທີ່ ນັບຖືສາດສະໜາອິດສະລາມໄດ້ປ່ຽນ ເຄື່ອງໝາຍກາກະບາດ ສີແດງມາເປັນກາຊີກວົງເດືອນແດງ ໂດຍເລີ້ມຈາກປະເທດຕວກກີ, ອີຢິບ ແລະ ອື່ນໆ.
ອົງການກາແດງລາວ ໄດ້ສ້າງຕັ້ງຂຶ້ນເມື່ອ ວັນທີ 1 ມັງກອນ 1955 ໄດ້ຖືກຮັບຮູ້ຈາກຄະນະກຳມະການກາ ແດງສາກົນ ແລະ ໃນນາມເປັນສະມາຊິກຂອງສະຫະພັນກາແດງ ແລະ ຊີກວົງເດືອນແດງສາກົນ ຊຶ່ງປະຈຸບັນມີຈໍານວນສະມາຊິກທັງໝົດ 187 ປະເທດໃນທົ່ວໂລກ, ອົງການກາແດງລາວ ເປັນອົງການຈັດຕັ້ງ ທາງ ສັງຄົມໜຶ່ງຊຶ່ງມີພາລະບົດບາດຊວ່ຍໜູນລັດຖະບານໃນການຈັດຕັ້ງປະຕິບັດໜ້າທີ່ທາງດ້ານມະນຸດສະ ທໍາຕໍ່ປະຊາຊົນບັນດາເຜົ່າທີ່ດອ້ຍໂອກາດໃນການພັດທະນາຕົນເອງທີ່ດຳລົງຊີວິດຢູ່ເຂດຫ່າງໄກສອກ ຫຼີກ ແລະ ຜູ້ທີ່ມີຄວາມສ່ຽງໄພສູງຕໍ່ໄພພິບັດທາງທຳມະຊາດ ແລະ ມະນຸດສ້າງຂຶ້ນ. ຕະຫຼອດໄລຍະ 1 ປີ ທີ່ຜ່ານມາອົງການກາແດງລາວໂດຍອີງໃສ່ການຕອບສະໜອງດ້ານງົບປະມານຈາກລັດຖະບານ ແລະ ການອູ້ມຊູຊວ່ຍເຫຼືອຂອງກາແດງປະເທດເພື່ອນມິດ ແລະ ການລະດົມທຶນຮອນຢູ່ພາຍໃນປະເທດ ດວ້ຍຫຼາຍ ຮູບການແຕ່ກໍຍັງຢູ່ໃນຂອບເຂດຈຳກັດນັ້ນ, ໄດ້ຈັດຕັ້ງປະຕິບັດກິດຈະກຳຕາມພາລະບົດບາດ ໃຫ້ການ ຊວ່ຍເຫຼືອບັນເທົາທຸກແກ່ຊຸມຊົນ ທີ່ສ່ຽງໄພສູງແລະຢູ່ເຂດຫ່າງໄກສອກຫຼີກ ເຊັ່ນ: ການປະຕິບັດໂຄງການຮັກສາສຸຂະພາບຂັ້ນພື້ນຖານຢູ່ 5 ແຂວງພູດອຍພາກເໜືອ ກວມເອົາ 13 ເມືອງ ມີ 154 ບ້ານ, ມີການຈັດຫານ້ຳສະອາດ(ນ້ຳລິນ 112 ແຫ່ງ,ນ້ຳບາດານ 7 ບໍ່ ແລະ ນ້ຳສ້າງ 26 ບໍ່),ວິດຖ່າຍ, 6.701 ຂຸມ ການປັບປຸງແລະສ້າງໂຮງຮຽນ ປະຖົມຂອງບ້ານ 43 ຫຼັງ, ສ້າງຫໍພັກໂຮງຮຽນ 7 ຫັຼງ, ການ ປະກອບອຸປະກອນການສອນສິດສອນ ແລະ ໂຄສະນາ ,ປ່ອຍທຶນສິນເຊື່ອຂະໜາດນ້ອຍໃຫ້ຊາວບ້ານ ໄດ້ 40 ບ້ານ, ສ້າງອາສາສະໝັກກາແດງປະຖົມພະຍາບານ, ສ້າງໝໍຕຳແຍຊວ່ຍເກີດລູກ, ໂຄງການໂຄສະ ນາຕ້ານເອດໃຫ້ແກ່ຊາວໜຸ່ມ, ໃຫ້ຄວາມສຳຄັນແລະເບິ່ງແຍງດູແລຜູ້ທີ່ຕິດເຊື້ອໂດຍຈັດຕັ້ງເປັນກຸ່ມຜູ້ຕິດ
ເຊື້ອຢູ່ 11 ສາຂາແຂວງ, ໂຄງການຈັດຫາຜູ້ບໍລິຈາກເລືອດແບບສະມັກໃຈໂດຍບໍ່ຮຽກຮ້ອງສິ່ງຕອບແທນ ກວມເອົາ 14 ສາຂາແຂວງໃນທົ່ວປະເທດ (ສະເພາະນະຄອນຫຼວງວຽງຈັນ, ແຂວງວຽງຈັນ ແລະ ບໍລິຄຳໄຊແມ່ນມີການເຄື່ອນໄຫວຂອງສູນບໍລິຈາກເລືອດແຫ່ງຊາດ) ນອກນັ້ນຍັງຂະຫຍາຍຕາໜ່າງເກັບຮັກສາຖົງເລືອດຢູ່ 9 ສາຂາຂັ້ນເມືອງຕື່ມ.
ການສະເຫຼີມສະຫຼອງວັນສ້າງຕັ້ງກາແດງແລະກາຊີກວົງເດືອນແດງສາກົນ ກໍຄືວັນທີ 8 ພຶດສະພາ 2010 ປີນີ້ແມ່ນພໍດີຄົບຮອບ 151 ປີ.
ມື້ນີ້, ອົງການກາແດງລາວ ພ້ອມດວ້ຍບັນດາທ່ານທີ່ມີກຽດ ກໍໄດ້ພ້ອມພຽງກັນສະເຫຼີມສະຫຼອງວັນສຳຄັນທາງປະຫວັດສາດດັ່ງກ່າວຢ່າງເປັນຂະບວນຟົດຟື້ນ ນີ້ ຄື ວັນທີ 8 ພຶດສະພາ ເພື່ອໃຫ້ທຸກຄົນໄດ້ຮັບຮູ້ ແລະ ເອົາໃຈໃສ່ໃນຕໍ່ໜ້າ, ເຊິ່ງມັນໄດ້ບົ່ງບອກເຖີງອຸດົມການ ແລະ ຄວາມມຸ້ງໝາຍ ທີ່ໄດ້ຖືເອົາມື້ນີ້ເປັນວັນສຳຄັນຂອງວັນກາແດງ ແລະ ຊີກວົງເດືອນແດງສາກົນ ໂດຍປະຕິບັດຕາມ 7 ຫຼັກການພື້ນຖານຂອງຂະບວນການກາແດງສາກົນວາງອອກຄື: ຄວາມມີນ້ຳໃຈມະນຸດສະທໍາ ຄວາມທ່ຽງທຳ, ຄວາມເປັນກາງ, ຄວາມເປັນເອກະລາດ, ຄວາມເປັນເອກະພາບ, ຄວາມສະໝັກໃຈ ແລະ ຄວາມມີນໍ້າໃຈສາກົນ. ສິ່ງທ້າທາຍອັນໃຫຍ່ຫລວງ ແລະ ສຳຄັນກໍຄືການປົກປ້ອງກຽດສັກສີຂອງມວນມະນຸດຊຶ່ງມີຫລາຍສິ່ງຫລາຍຢ່າງທີ່ປະເຊີນຢູ່ຂ້າງໜ້າ ເຊັ່ນ: ການກໍ່ການຮ້າຍ, ການລະບາດຂອງພະຍາດ ແລະ ໄພພິບັດຕ່າງໆ. ເພື່ອເປັນການລໍ້າລຶກເຖີງການກໍ່ຕັ້ງອົງການຈັດຕັ້ງມະນຸດສະທຳ ທີ່ມີການເຄື່ອນໄຫວຢ່າງກວ້າງຂວາງແລະແຜ່ຫລາຍໃນໂລກ ໃນປີນີ້ ຢູ່ທີ່ນະຄອນຫຼວງວຽງຈັນມື້ນີ້ ໄດ້ມີການ ** ຢ່າງເພື່ອສຸຂະພາບ ແລະ ຂະບວນ ການປຸກລະດົມຂົນຂວາຍຜູ້ບໍລິຈາກເລືອດແບບສະໝັກໃຈບໍ່ຮຽກຮ້ອງສິ່ງຕອບແທນຢູ່ສູນບໍລິຈາກເລືອດແຫ່ງຊາດ ** ກໍໄດ້ພ້ອມພຽງກັນສະເຫຼີມສະຫຼອງວັນສຳຄັນດັ່ງກ່າວນີ້ຂຶ້ນຢ່າງເບີກບານມວ່ນຊື່ນ ແລະ ຟົດຟື້ນ, ສຳລັບ ບັນດາສາຂາກາແດງແຕ່ລະແຂວງໃນທົ່ວປະເທດກໍໄດ້ມີການຈັດຕັ້ງປະຕິບັດການສະເຫຼີມສະຫຼອງວັນດັ່ງກ່າວຕາມສະພາບຄວາມສາມາດຕົວຈິງ ແລະ ເງື່ອນໄຂຂໍ້ສະດວກຂອງແຕ່ລະສາຂາອີກດວ້ຍ.
- ທ່ານ ແຂກທີ່ມີກຽດ.
- ທ່ານ ຍິງ ແລະ ທ່ານຊາຍ ທີ່ຮັກແພງ.
ຂ້າພະເຈົ້າ, ໃນນາມປະທານອົງການກາແດງລາວ ຂໍເປີດພິທີນີ້ຢ່າງເປັນທາງການ ນັບແຕ່ວິນາທີເປັນຕົ້ນໄປ.
ຂໍຂອບໃຈ
ທີ່, ນະຄອນຫຼວງວຽງຈັນ, ວັນທີ 8 ພຶດສະພາ 2010
ປະທານອົງການກາແດງລາວ
ດຣ. ສນິວຸຣັຊ ສຣະມານີ. |
